وين الشعار ..... اشعلوها حريقا

[راعي السمرا]

السلام عليكم ومبارك عليكم العيد ولو متأخره وتقبل الله الطاعه من اخواننا الحاجين

يالشاعر استلم لا هنت

ياللي تحب الشعر تراني الليـــــله
اسل سيف الشعر وعدل الميــــله
واهدم بيوت الهزل وشيلها شيـله
والخير واجد ورب الكون مغنيني


يا سلامي سلامن مثل سلم الجدود=وانا نفسي شجاعه..صح ولا خـطا
الشجاعه جزاعه وللجزاعه حدود=والليالي قنيـــــعه.... صح ولا خطا

[السيف القاطع]

ارحب ياراعي السمرا والله يحييك ومن العايدين الفايزين

واستلم طال عمرك



يامرحبا عد ماهمل من المزني=ترحيبتن للرجال اللي لهم وزني
يالشاعر اللي تسل السيف بارزني=والخير واجد ورب البيت مغنيني


مرحبا ياهلا والليل جعله يعود=غن ساعه وساعه ..صح ولا خطا
الشجاعه معا اللي مايبيح السدود=وانت عندك مناعه..صح ولا خطا

[راعي المجاهيم]

عاااااااااااااشو الشعار

متابعيييييييين

[راعي السمرا]

استلم لا هنت
يوم المعارك يبات الرجل موفـيها
وانا معتادن ارد البل ما ارثــــيها
واللي يناطح جنود القوم يفنـــيها
والخير واجد ورب الكون مغنيني



يا عميلي تركد ما لك اليـــوم قـــــود=والعرب في شباعه....صح ولا خطا
الشجاعه قناعه وانا رجلن صمــود=وانت تبغى القلاعه... صح ولا خطا

[السيف القاطع]

وقت المعارك مضي ياللي ذكرت الحروب=ماعاد كون المهايط صار مثل الشروب
والله لااردك واحدك من جميع الدروب=والخير واجد ورب البيت مغنيني


الجمل ياراع السمرا رموح وهبود=لا تجود ذراعه ..صح ولا خطا
اسمع العلم واسلم والخلايق شهود=قول سمعن وطاعه..صح ماهو خطا

[راعي السمرا]

استلم لا هنت
انت بقولك تجر الموت لعيـــــونك
اصبر تركد تحرى الدم بسنــــونك
والله لسد اللحن لزانت الحــــونك
والخير واجد ورب الكون مغنيني


الجمل ما يلاحي غير رجلن زوهـــود =وانت خفت القطاعه .... صح ولا خطا
يا صحيبي تساوي كل حمرا بقعــــــود=الوساعه الوساعه .... صح ولا خطا

[السيف القاطع]

تفتح لنا الصفحة اللي مانويناها=تبحث عن نصاب سكيني وتلقاها
باصبعك تفقع عيونك وانتثر ماها= والخير واجد ورب البيت مغنيني


عارفن انه ليا حمي الملاقا شرود=كان بغسل شراعه ..صح ماهو خطا
اشهدن كبده اكبر من جميع الكبود=لو نحط الاشاعه..صح ماهو خطا

[راعي السمرا]

استلم لا هنت

توك الملاقا سيوفن تصحب المنه
وانت بشرد الملاقا تاخــــــذه سنه
خل الزقاره تبري الكبد بالكـــــــنه
والخير واجد ورب الكون مغنيـني


الليالي جزيــــعه والردى سم العهــود=صـــــــورتك بالاذاعه... صح ولا خطا
الموانع كثــــيره ما ترد الاســــــــــود=وانت تهوى الطقاعه....صح ولا خطا

[السيف القاطع]

راع السمرا انا اعتذر عن اكمال المحاورة معك وارجو ان تراجع ابياتك وترتقي بالفاظك .

الكلام الفاضي كثير واقدر ارد عليه لاكن تقديرا للمنتدى وللقائمين عليه وتقديرا للزوار والشعار اترفع عن مثل هذه الالفاظ التي لاتخدم الشعر ولا الشاعر.

ارجو تقبل الاعتذار ونلتقي في لقاءات تكون افضل للجميع الشكر والتقدير......

[راعي السمرا]

صح السانك والى لقاء اخر وهذا كله كلام فاضي لا يستمد على واقع واسف اذا جرحت مشاعرك والجايات اكثر .
وترى الدعوه ملعبه وانا اخوك....

وصح السانك مره اخرى

... راعي السمرا ...