من يبي كسب العلاء سهر الليالي

[أبو حزام]

قال من عدى حجا نفنـوف عالـي = ضأيقٍ صـدره وكاثـرةٍ شطونـه
ابدع القيفان مـن ضيقـات بالـي = والغناء ما هي بتخفانـي لحونـه
هاضني ياهل الوفاء شيً طرالـي = وقلت قـولً بعلنـه للـي يبونـه

اشهدً العـز فـي كثـر الحلالـي = والعرب من قال مالـه يكرهونـه
من معه مالً تراه يصيـر غالـي = والفقير النـاس لازم يرخصونـه

يرخصه حتى الرفيق اللي موالـي = وأسرتـه لقـل مالـه يبغضونـه
لا يريـده لا عمـام ولا خوالـي = ويمكن ان عيال ابـوه يقاطعونـه

والله لو هو مثل ابو زيد الهلالـي = مـا يحسبونـه ولا يستعبـرونـه
والغني لو كان ما يسـوى ريالـي = غالـيً عنـد العـرب ويقدرونـه

ويمدحونه كل مـا جالـه مجالـي = وان بدالـه لازمً يقضـون شونـه
لو ذليـلً يخلعـه زول الظلالـي = ما يكافح لو (يدفـل) فـي عيونـه

أو بخيلً عن مزايا الجـود خالـي = يأخـذون بخاطـره ويجاملـونـه
عندهم هرجه كما السمن الزلالـي = والفقير اليـا هـرج يستنكرونـه

كم يعز المال من جـرفً هيالـي = وكم عزيزً معسرً كثـرت ديونـه
وكم رديًٍ حيث بيـده راس مالـي = جاوُ عكفان الشـوارب يخدمونـه

حدة الحاجـة كريميـن السبالـي = يسمعون امـر الـردي وينفذونـه
وغيرة مجرى الدهر سود الليالـي = واختلف طبع الخلايق عن يكونـه

واليمـن اليـوم تغلبهـا الشمالـي = والعوارف مقصدي مـا يجهلونـه
كل من كثرة فلوسـه مـا يبالـي = وان خطب عند الرجال يجوزونـه

والبني البيض حلـوات الدلالـي = من عجز في المرجلة عافً فنونه
والمراجـل مـا تهيـا للرجالـي = غير من عقـب اجتهـادً يبذلونـه

من يبي كسب العلاء سهر الليالي= والكسل يـرث لراعيـه المهونـه
صدقونـي يامداغيـش العيـالـي = اتركوا نوم الضحـى لا ترقدونـه

ودي ارشدكم ولو ما ارشدت حالي = منصـحً بالنصـح للـي يقبلونـه
والرجاء يالعارفين مـن الرجالـي = لا بـدى منـي قصـورً تكملونـه

واسمحولي يالنشمـا فـي مقالـي = والسـلام اختـام للـي يسمعونـه
قالها اللـي ذايـقً مـرً وحالـي = وله روابع واخلفت بقعاء ضنونـه

[أبوعبد العزيز]

صح لسانك وبارك الله فيك